Profil dla biblioteca

La Biblioteca provinziala „Dr. Friedrich Teßmann“ é gnüda metüda sö cun la lege provinziala n. 5 di 16 de forà dl 1982 y porta l’inom dl iurist y politich de Südtirol Friedrich Teßmann (* ai 15 de forà dl 1884 a Schloss Korb a Eppan; † ai 23 de jügn dl 1958).
Dl 1957 ti à Teßmann scinché süa biblioteca privata, metüda adöm dantadöt da Tirolensia (incër 12.000 volums y passa 1000 operes grafiches) ala „Österreichische Akademie der Wissenschaften“ a condiziun che la racoiüda gniss metüda a desposiziun al publich a Balsan y che ara gniss ampliada tresfora cun publicaziuns nöies corespognëntes.

L’Academia ti à surandè la racoiüda Teßmann al „Südtiroler Kulturinstitut“ che menâ bele na süa picia biblioteca de stüde, a na moda ch’al la aministrass y ćiarass dla racoiüda.
Canche al é gnü metü sö la Biblioteca provinziala dl 1982 ti à le “Südtiroler Kulturinstitut” surandè süa biblioteca de stüde, y l’Academia ti à surandè sciöche imprëst permanënt la racoiüda Teßmann, che ê deventada tres majera.

Incö é la Biblioteca provinziala la maiù biblioteca scientifica generala de Südtirol.

Pruspet 50 agn Teßmann (1958-2008)


Prioritês por la racoiüda dla Biblioteca provinziala "Dr. Friedrich Teßmann”

La Biblioteca provinziala abina adöm dantadöt materiai scrić por todësch ti ćiamps de savëi desfarënć (ater co leteratöra por i mituns y por i jogn).

Tirolensia
La Biblioteca provinziala abina adöm döt le material che é gnü scrit da porsones de Südtirol, sura Südtirol y che é gnü publiché te Südtirol. Na gran importanza ti vëgn dada inće ales publicaziuns dl raiun dl vedl Tirol.