Sce i monns di libri 2025 ti ciara sot le moto "Iö – tö – nos“ dantadöt a nosta cultura dl convire saltel sö öna na domanda: Ci faziun á pa i libri sön nosta convivënza? Deventunse pa porsones plü soziales da lí? De chësta domanda baia Gerhard Lauer te so discurs de daurida. Sciöche professur de bibliologia tl'Université Johannes Gutenberg a Mainz inrëscel aspec desvalis dl lí tl tëmp digital. Dialalungia á i pedagogs y i auturs (al é veramënter sté plülere ëi) araté la vëia da lí, altamo de romans, nia cis adatada por alzé la morala dla jonëza y dles ëres. Impormó tl 21ejim secul vëgnel sö la tesa, che la leteratöra podess nes trasformé te porsones plü empatiches. Nes dëida pa le lí veramënter da ti ester ai preiudizi y da nes comporté a na moda plü soziala?

Gerhard Lauer, professur tl'Université Johannes Gutenberg a Mainz, ejaminëia ci che al é bele gnü inrescí y ci che ne l’é nia ciamó.