Dl 1929 iel unì publicà pra la Hogarth Press a Londra, la cësa editëura de Leonard y Virginia Woolf, l pèr de scritëures cunesciù, n pitl liber dal titul “Danger Zones of Europe. A Study of National Minorities”. Te chësc essay analisova l culaburadëur dla Sozietà dla Nazions y storich nglëisc John S. Stephens (1891–1954) la situazion dla mendranzes naziuneles tl’Europa do i spustamënc di cunfins n cunseguënza dla Prima viera mundiela amunian che cunflic nia ressolc ëssa pudù generé vieres nueves. Si prognosa fova scialdi prezisa – y resta estremamënter atuela.
L liber, che ne ie nia plu da giaté da cumpré tl uriginel ma che ie śën unì repurtà tl tudësch per l prim iede da Maria Kampp y cumentà da Hannes Obermair y Josef Prackwieser, iluminea l rodul dla mendranzes sciche costrutëures de puenc danter la nazions y trasmët la mpurtanza de na vera defendura dla mendranzes per l mantenimënt dla pesc. Na tematica scialdi atuela per nosc tëmp caraterisà dal se descedé inò di vedli naziunalisms y cunflic.

Do i doi referac de mpuls curc de Hannes Obermair (Senior Researcher de Eurac Research y storich) y Josef Prackwieser (Culaburadëur scientifich pra l Center for Autonomy Experience de Eurac Research) saral na descuscion danter i doi referënc che respuenderà nce ala dumandes dl publich. Katharina Crepaz (Senior Researcher pra l Center for Autonomy Experience) mëina tres la sëira.

Na scumenciadiva metuda a jì deberieda dala Biblioteca provinziela Dr. Friedrich Teßmann, dal Center for Autonomy Experience de Eurac Research y dala Edizion Alphabeta.