For plu mutans y mutons crësc su cun plu de una rujeneda. Tl medemo tëmp vën la situazions te chëles che la rujeneda vën mpareda ncueicundì dut ntëur plu deferenziedes y cumplichedes. La mutans y i mutons possa audì rujenedes defrëntes da si genitores, da si fredesc y surans o te si ntëurvia, te scolina o a scola. Vel’ rujeneda vën plu dëibla sce i genitores se spartësc, sce la familia trapina o sce l vën mudà istituzion. La mpurtanza che la rujenedes singules possa avëi tla vita dantaldut nchin tl’età dl jì a scola possa vester scialdi defrënta y se mudé cun l tëmp. Mic y melntendimënc n con’ dl plurilinguism de mutans y mutons se mantën purempò tla families y nchinamei pra chi che se dà ju cun chësta tematica. Canche l se porta pro problems tl svilup de na muta o de n mut cun de plu rujenedes, ti vëniel suvënz dat la gauja al’educazion plurilinguela. Pervia de chësc iel plu rie per la families giapé n sustëni adatà per si muta o mut. L referat auza ora cie che ie mpurtant pra l’acuisizion plurilinguela y coche la persones de referimënt possa vester de sustëni. Dedò respuend la referënta ala dumandes dl publich.

Pruf. Dr. Wiebke Scharff Rethfeldt ie prufessëura de logopedia pra la “Hochschule Bremen” y vize-presidënta dla lia mundiela per la scienzes y per i desturbs dla comunicazion “Weltverband für Wissenschaften und Störungen der Kommunikation” (IALP). La ie esperta ti ciamps dl plurilinguism y dla diversità culturela dla logopedia. La se dà ju dantaldut cun l svilup dl rujené, dla rujeneda y dla comunicazion de mutans y mutons che crësc su cun de plu rujenedes, coche nce cun la diagnosa bonoriva di desturbs dl svilup dl lingaz y si tratamënt logopedich y cun la cunsulënza individuela per families.

Na manifestazion dl Ufize linguistich tl Südtiroler Kulturinstitut, dla Bibliotech provinziela Dr. F. Teßmann y dl Orden di jurnalisć dl Trentin-Südtirol.