Val’ porsones á ma pücia visibilité te nosc monn publich (medial), y sce ares é da odëi, spo ne áres por na gran pert nia instësses la parora, mo al vëgn baié o scrit de d'ëres. Chësc vel por les ëres, scebëgn che ares fej fora le mez dla popolaziun, y ince por les porsones cun n background de migraziun, por la generaziun de jënt plü atempada y chëra de jënt plü jona, les porsones cun na dejabilité, chëres che ne davagna püch y nia o che toca pro na mendranza religiosa o sessuala. Implü vëgn chëstes porsones sovënz presentades cun stereotips. Generalisaziuns stereotipades pó ester descriminëntes (ince sce al n'é nia orü) o pó cinamai alimenté sënn o tëma. Ince tres la combinaziun de test y imajes pól gní renforzé preiudizi.
Co funzionëia pa na comunicaziun che ti vá pormez ala diversité de nosta sozieté cun responsabilité impede cun stereoptips? Te so referat dará Martina Thiele na resposta a chësta domanda. Te sü stüdi se ára dé jö cun i stereotips ti media y ara nes mostrará sciöche an fej da i reconësce, i analisé criticamënter y i schivé.

Prof. Dr. Martina Thiele insëgna tl Istitut por sciënzes di media dl'Université Eberhard-Karl de Tübingen. Te sües inrescides se conzentrëiera danterater sön la desvalianza soziala ti y tres i media. Dal 2010 incá éra stada comëmbra y plü tert ince a ce dl Consëi interdisziplinar de espertes y esperc de "Gender studies" dl'Université de Salzburg, olache ara á inrescí y insigné dal 2003 al 2020. Te sü scric y te sües publicaziuns se dára jö cun stereotips de gënder y de rode sön la basa de n'analisa di media critica.

Na manifestaziun dla Gesellschaft für deutsche Sprache/seziun de Balsan, dl Ofize linguistich tl Südtiroler Kulturinstitut, dla Biblioteca provinziala Dr. F. Teßmann, dla Volkshochschule Südtirol y dl Ordin di jornalisć dl Trentin-Südtirol.