La porsona contestada Ettore Tolomei (1865-1952) y süa arpejun incompra – inteletuala, mo dantadöt materiala – á tres indô porté a contrasć y iritaziuns, y cinamai a atentac eclatanc tl raiun por chël che al á cherié la denominaziun ofiziala taliana. Al é imposcibl da despartí le destin dl Südtirol dal percurs politich y personal dl geograf trentin, che é naota sté iredentist y spo fascist, y é a vigni moda dagnora gnü animé da n gran nazionalism nia zënza fanatism. Sciöche senatur y precursur dla talianisaziun sforzada dl Südtirol ál stlüt jö al scomenciamënt di agn 1920 l’opera de redaziun dla toponomastica taliana metüda man bele dl 1906 – chël ó dí cotan dan le Tratat de Saint-Germain y la surantuta dl podëi de Mussolini –publicada tl Prontuario conesciü, che é gnü tres indô ajorné y publiché danü. Chësta toponomastica vel tres ciamó y impëia tres indô de vedles stritaries o öga sciöche vertora por indeblí vigni sforz de na dërta convivënza danter lingac y cultures desvalis.

Sciöche unica monografia scrita cina sëgn sön Tolomei recostruësc chësta opera a na moda menüda la vita plülere turbolënta de n ël che é tl medemo tëmp sides l’espresciun de so tëmp che ince l’emblem di nazionalisms de düc i tëmps y posć. Na monografia che descrí na personalité complessa te chëra che al se respidlëia i avenimënc plü importanc dla storia de n raiun - post de conflic nia ciamó daldöt superá.

La publicaziun nöia pita le poscibilité da mëte a jí n’incuntada danter l’autur y jornalist Maurizio Ferrandi y le storich Hannes Obermair. Dla moderaziun se crüzia la storica Adina Guarnieri.

Na manifestaziun dles döes biblioteches provinziales “Claudia Augusta” y “Dr. Friedrich Teßmann” en colaboraziun cun Edizioni Alphabeta Verlag

Dales 20:00 | Entrada dales 19:30 inant
Gnide adora assá! Resservede n post da senté tres le sistem de prenotaziun sön la plata web dla Biblioteca provinziala! La manifestaziun vëgn tignida tl salf de letöra dla Teßmann tl respet dles mosöres de segurëza varëntes.